विपिन यादव/टोलपडोस
जनकपुरधाम, माघ २८ । कटुवा पेस्तोलसहित सिरहाबाट एक युवक पक्राउ परेका छन् ।

पक्राउ पर्नेमा औरही गाउँपालिका ४ कमलपुरका २० वर्षीय सरोजकुमार यादव छन् । उनलाई शनिवार राति पक्राउ गरिएको सिरहा प्रहरीले जनाएको छ ।

प्रहरीका अनुसार सिरहा नगरपालिका ७ सल्हेश मन्दिरबाट पक्राउ परेका यादवको साथबाट एक थान कटुवा पेस्तोल बरामद भएको छ । उनको उक्त स्थानमा डेरा गरी बस्ने औरही गाउँपालिका ३ का २२ वर्षीय संजितकुमार यादवसँग विवाद भएको थियो ।

उनीहरूबीच विवादको खबरसँगै वडा प्रहरी कार्यालय सिरहाबाट प्रहरी नायव निरीक्षक अमितकुमार रायको कमान्डमा खटिएको प्रहरी टोलीले सरोजकुमार यादवलाई पक्राउ गरेको हो । तलासी गर्दा उनको साथबाट उक्त पेस्तोल बरामद भएको थियो ।